مجموعه من الابو ذيات - شعر شعبي عراقي

2011-04-07, 5:35 pm

السلام عليكم
هذه اول مشاركة
وافتتحها بأبيات الابوذيه من الشعر الشعبي العراقي

ذبت وبنار هجرك ... مايع آني
وعفت كَلبي يعاني ...مايعاني
إذا تعطش أشربك ... ماي عيني
وأجيب الروح لعيونك هديه

ألك اجمل رسالة ابعث .. وأرقها
حبرها دموعي وقلبي .. ورقها
يالمسبب سهر عيني ...وأرقها
عزيز وشوفتك صعبت عليه

جذب من كال عنك ... مره شفتك
العسل لسه بشفافي ... مره شفتك
الحذر لو ويه غيري ... مره شفتك
أنتحر بيك وأموتك بين أيديه.

ألف وسفه الوكت عنك ... بعدني
أموتن وأرتجي وصلك... بعدني
تراني عالعهد باقي ... بعدني
ويظل هذا العهد للموت بيه.

أصد وأزعل وأدير العين ...طبعا
لأن لجمات ألك بالكَلب ... طبعا
حلو وتنحب لكن بيك ... طبعا
تشك وتغار من روحك عليه.

جلد فركاك خلاني .. ولعظام
لو تدري شكثر لأجلك..ولع ظام
مو دوم اشتكيلك وأبجي..والأعظم
شعلت الروح من فركاك أليه

ظل غامض سؤالي وياك.. منحل
وجسمي من السهر بالليل.. منحل
وحياتك صرت بين الناس.. منحل
العسل حصتك وأنا اللسعات أليه

حياتي عكب شخصك .. شلي بيها
وجميع أعضاي صارت..شله بيها
توديلي رسايل ... شلي بيها
أريدن شوفتك والكعدة سويه

أناغيله وامشطله ...وأسبحة
وصرت خاتم انه بيده ...وسبحه
أحلف بي وأعبدنه ...وأسبحه
لأن حبه صفه أواجب عليه.

سمارك ياحلو صاير ...وفر بيك
مثل محبس صرت بيدي...وفربيك
ابوكَك من حضن أمك ... وفر بيك
وأروحن بيك لطراف الوطيه.

هام العكل من شوكك ... وجن بيك
شبيه الكمر من يضون ... وجن بيك
أبوسك لو يحبسوني ... وجن بيك
أوامر من وزير الداخلية

حسنك معجزة يالغز... ياسر
الرمش يكتل واذا ماكتل ...يأسر
نخيت الكل صبرا ... آل ياسر
يحفظه بجاه عمار وسميه.

تحياتي
AMORY

2011-04-08, 10:49 pm

عاشت ايدك عموري اشعار في غاية الروووعه واجملهن

حسنك معجزة يالغز... ياسر
الرمش يكتل واذا ماكتل ...يأسر
نخيت الكل صبرا ... آل ياسر
يحفظه بجاه عمار وسميه.

مجموعه من الابو ذيات - شعر شعبي عراقي 893352